Nina beSilo izolo bekuphela iminyaka engama 142 kwalwa impi yaseTshaneni.ITshaneni intaba esenyakatho yomfula uMkhuze.Impi yaseTshaneni kwakuyi mpi yomndeni (Civil War) eyayiphakathi kweSilo uDinizulu noMntwana uZibhebhu,le mpi yalwa mhlaka 5 kuNhlangulana 1884.Ngokusho koNtabayezulu uma babewuxoxa umlando wayo bathi le mpi yalwa ngenxa yomyalelo weSilo uCetshwayo esawuyalela iWundlu laso uDinuzulu ukuba lisiphindeselele kuMntwana uZibhebhu owamisa kabi iSilo uCetshwayo ngesikhathi sokubusa kwaso elekelelwa ngamaNgisi.Kuthiwa iSilo uCetshwayo lawo mazwi sawasho ngenkathi sesidunguzela,uMalimade esesidlisile ushevu.Sagcina isikhotheme iSilo uCetshwayo ngoNhlolanja(Februay)1884.Impi yaseTshaneni yona yalwa ngoJune wawo u1884 sekubusa iSilo uDinuzulu.Kuthiwa ngaphambi kokuba ilwe lempi kwaqhamuka umngane weSilo uDinuzulu uBotha wethembisa iSilo uDinuzulu ukuthi wayezoselekela ukuba sidle umhlangiso kuMntwana uZibhebhu.Kuthiwa ngempela savuma iSilo sakithi oSuthu kwathi lapho isinyathela awabantwana uBotha waqhamuka ngempela nabangane bakhe ababezibiza ngeDinuzulu Volonteers ,beholwa yiBhunu uLukhwazi (uLucas Meyer),kukhona nabanye esingabala kubo uPaul Bester,iJalamana uAdolph Schiel kanye nabanye.Yawudla umhlanganiso impi yeSilo uDinuzulu okuthiwa yayiholwa yisona iSilo uDinuzulu sigibele iNjomane yaso emnyama.Kwathi ngo1888 ngoNhlangulana zaphinde zanqikilana futhi kwaNdunu uSuthu noMandlakazi,nakhona futhi yawudla umhlanganiso eyoSuthu.
Khumu!
