Seligqabuke ngempela igoda phakathi kweMK Party noFloyd Nyiko Shivambu osanda kudilizwa yile nhlangano iMK Party esikhundleni sokuba uNobhala jikelele wale nhlangano wehliselwa esikhundleni sokuyomela leli qembu ePhalamende.Leli qembu leMK Party liholwa nguBaba uJacob Zuma owake waba uMengameli wakuleli.UShivambu ukhwele wadilika kule nhlangano ngenkathi ebambe isithangami nabezindaba namuhla mhlaka 19 Juni 2025.Umfoka Shivambu uthi uMsholozi uzungezwe izixhwanguxhwungu eziphethe le nhlangano ngobudedengu,ezikhipha izimali ezishisiwe kule nhlangano maviki wonke okuyimali egcina ingaziwa nokuthi isebenzeni.Uthi kuphuma izimali ezilinhganiselwa koR7million maviki wonke kule nhlangano.Ngokombiko owethulwa nguMsholozi wathi isizathu sokudilizwa kukaShivambu esikhundleni sakhe sokuba uNobhala jikelele waleli qembu kwaba wukuthi wayevakashele uMfundisi uBushiri eMalawi.UMsholozi wathi ukuhambela kukaShivambu ezweni laseMalawi kwaphambana nomthethosisekelo waleli qembu.Ekhuluma nabezindaba namuhla uShivambu uthe okwashiwo nguMsholozi akulona iqiniso,uthe iqiniso lithi wadilizwa ngoba kuleli qembu kwasekusabalele amahlebezi ayethi yena uhlela ukuketula uMsholozi ekuholeni le nhlangano.Uqhube wathi yena akananxa noMsholozi,usamkhonze kakhulu.Ebuzwa ngokuthi ngabe uzosungula eyakhe inhlangano uphendule ngokuthi yena nabasondelene naye basozoxhumana nabantu baseNingizimu Afrika ngezinkundla zokuxhumana babhunge ngendlela eya phambili.Uma kuwukuthi kumele lisungulwe iqembu elisha bazolisungula.
Ligqabuke ngempela igoda phakathi kukaShivambo neMK Party
