Uzoyikha ngeFosholo uMusona eqenjini lakhe elisha laseZimbabwe

Iqembu lebhola laseZimbabwe iScotland FC lisayinise uKnowledge Musona(34) ngesizumbulu semali esengadalulwanga kulandela ukudedelwa kwakhe yiAl-Okhdood edlala kwiSaudi Pro League ezweni laseSaudi Arabia.Kubikwa ukuthi ukusayiniswa kukaMusona kwephule eLekhodi lokusayiniswa kwabadlali kwiLigi ekhokelwayo yaseZimbabwe.Kanti kubikwa nokuthi uMusona uzoba nguyena mdlali oyohola ukwedlula bonke abadlali beCastle Premiership okuyiLigi enkulu yaseZimbabwe.Lo mdlali owake wagijima kwiKaizer Chiefs uzobe eqala ngqa ukudlala kwiLigi ekhokhelayo yaseZimbabwe kwazise ngenkathi efika kwiziMpofu wayekade esuka kwiAces Academy okuyiwuQeqesho olupheka abadlali bebhola oluzinze eHarare khona eZimbabwe.UMusona uzodlala ekanye nomnawakhe uWalter Musona kuleli qembu leScotland FC eliphethwe uPedzisayi “Scott” Sakupwanya okubikwa ukuthi uyiNgquphunga kaSozigidi.UWalter Musona naye wake wagijima kwiLigi yaseNingizimu Afrika egijima kwiPolokwane United.UKnowledge Musona wethulwe namuhla emini kwiScotland FC enkundleni yakhona eHarare ngenkathi kulindwe ukuba iqembu lakhe elisha linqikilane neYada FC khona eHarare.Kamuva nje uKnowledge Musona uke wezwakala ethi uyafisa ukuzophanyekela amaKhokho akhe kwiKaizer Chiefs ngisho noma kungathiwa uyodlala mahhala.