Iqembu leBhola likaNobhutshuzwayo laseNgilandi iManchester United selimemezele ukuthi selehlukene noMqeqeshi walo u-Erik ten Hag , ongowokudabuka eHolland .Ngokusho kweSitethimende seUnited esishicilelwe kwiWebsite yeqembu kuthiwa u-Hag uzibeke phansi izintambo namuhla emini. Kuthiwa owake wadlelela leli qembu u-Ruud van Nistelrooy nguyena ozobamba izintambo okwesikhashana , kuze kutholakale uMqeqeshi omusha. Kuthiwa u-Nistelrooy uzosekelwa yithimba labaqeqeshi ebelikade likhona ,lilekelela u-Hag. U-Nistelrooy naye unguMsinsi wokuzimilela wakhona kwelamaDashi (eHolland) . U-Hag wafika eOld Trafford ngoMbasa (ngoEphreli) 2022, wadla umhlanganiso ezindebeni ezimbili, okuyiCarabao Cup ngo2023 kanye neFA Cup ngo2024. Alikakaziwa ikusasa likaHag , nokho nyakenye kwake kwaba namahlebezi ayethi wayegaqelwe ngamaqembu aseMelika adlala kwiMajor League.
