Nina beSilo namuhla kuphela iminyaka eyi-147 kwalwa impi yakwaKhambula lapho kwakulwa khona uZulu namaNgisi,ngowe 1879,mhlaka 29 kuNdasa(March).Impi yakwaKhambula yelama impi yaseHlobane(eBaQulusini),nakhona okwakulwa uZulu namaNgisi.EyaseHlobane yayilwe ngayizolo mhlaka 28 kuNdasa,sawashaya amaNgisi eHlobane.Impi kaZulu eHlobane yayikhuzwa nguMntwana uMbilini ka Mswati wesibili kanye nenkosi uMnyamana ka Ngqengelele.Kwathi ngakusasa ngomhlaka 29 kuNdasa kwalwa impi yakwaKhambula,salugoba uphondo kuleyo mpi yakwaKhambula.KwaKhambula uZulu wawusukhuzwa yinkosi uMnyamana isiyodwa.Impi yamaNgisi yayikhuzwa nguKaputeni Henry Evelyn Wood owayikhuza ezikhawini zombili,kwesaseHlobane nesakwaKhambula.Kuzokhumbuleka nina beSilo ukuthi kwathi lapho sesiwehlulile amaNgisi eSandlwana ngomhlaka 22 kuMasingana 1879,agoloza ukuyivuma induku,aqhubeka elokhu ewuvuse njalo umhlwenga kwaze kwaba ngumhlaka 4 kuNtulikazi 1879 lapho asehlula khona,ashisa nesigodlo sakithi oNdini seSilo uCetshwayo.Kwathi ngomhlaka 28 kuNcwaba abopha iSilo uCetshwayo.
Kuphela iminyaka engama-147 kwalwa impi yakwaKhambula
